Sexu organo guztiak (en euskara)

Zakilez, barrabilez eta aluez hitz egingo dugula pentsatzera eramaten gaitu izenburu honek lehen kolpean. Agian polikiago pentsatzen badugu, gure sexualitatean inplikaturik dauden oinarrizko hainbat organo eta gorputz atal daudela ohar gaitezke.

Oso jakintsua den lagun batek zera esan zidan autoan elkarrekin gindoazen batean: “sexu organorik garrantzitsuena garuna da”. Ikus dezagun. Garunak gorputz guztia kontrolatzen du bai, eta bereziki desioa, motibazioa, ezta? Beraz bizitza sexualaren oinarri-oinarrian dago. Garunak askatasuna ematen digu fantasiak irudikatzeko, desiratzen dugunaren bila joateko, nahiak burutzeko, plazerra sentitzeko... Berak aldi berean mugak jartzen dizkigu, hala nola, frenatzen gaituzten beldurrak sortzen dizkigu edo sexu-unea bere osotasunean ez digu bizitzen uzten. Garrantzitsua da, beraz, eta hori motrizidadea kontuan hartu gabe, hau da, besoak, hankak, ahoa, gerriak... mugitzeko ezinbesteko dugula aipatu gabe.

Gogora dezagun gizakion behar basikoa dela sexu gogoa asetzea, intimitatezko harremanak izan eta gizarte sarean txertatuta sentitzea bezala. Jateko, edateko, hotza ez pasatzeko edo pixa egiteko beharraren parean dago sexu funtzioa, mendebaldeko gure kultura honek oraindik ukatzen duen arren. Garunaren zuzendaritzapean ditugun ikusmenaren, entzumenaren, usaimenaren, dastamenaren eta ukimenaren organoak ere berebizikoak dira. Ikusten dugunarekin bero gaitezke: zure ezpain horiek, gerriaren kurba leun batek, aurpegiaren edertasunak... Entzunez, hitzez, gertura gaitezke besteengana eta ezagutzen hasi. Ukituz jasotzen ditugu ondokoaren gogoen seinaleak. Larruazalaren zulo, zirrikitu, zehargune, tolesdurak plazerrari ederki lotuak datoz, bestetik. Usainak erakargarri gisa joka dezake eta dastamenak plazer berriak ekar diezazkiguke. Eta hauek adibide batzuk besterik ez dira. Aldi berean, organo hauetako batzuk erotismoz josita egon ohi dira: begiak, belarriak, larrua... hain presente ditugun zakilekin eta aluekin batera, titi eta ipurdien ondoan, bizitza erotikoaren parte direla ezin uka daiteke.

Esaten ari garen bezala, sexualitatearen bizipenean gorputz guztia inplikaturik dago eta, banako bakoitzak baditu, bereziki sentikorragoak edo kitzikagarriagoak zaizkion gorputzaren gune batzuk. Hauei, zona erogenoak deitu ohi zaie. Askotan pentsatu da emakumeok zona erogeno komunak ditugula eta gizonezkoek ere komunean dituztela eurenak. Eta hori horrela izanik ere, beharbada norbere atseginerako egokiagoa da aurresuposatzen diren zona erogeno komun horiek kontuan hartu gabe, zehazki norberarenak zeintzuk diren deskubritzeko abenturari ekitea.

Nerea Santxo

G puntuaren bila

Gräfenberg doktoreak zera deskribatu zuen 1950 urtean: emakumezkoen baginaren barruko gune zehatz batek, egokiro estimulatua izanez gero, orgasmoa ekartzeko gaitasun berezia zuela. Ekarpen hau oso eztabaidagarria izan da, ikerketek ezin izan baitute gune horren existentzia behar bezala baieztatu. Ia denok pentsatzen dugu ea non demontre dagoen puntu hori. Argibide zehatzak ematen dituzten hainbat liburu daude horixe deskribatuz. Atal honetan, ordea, hauek ez azaltzea erabaki dugu. Zergatik? G puntua mitifikatu egin delako eta mitoek kalte egiten dutela uste dugulako. Adibide bat jarriko dugu. Sexu jokabideen helburua orgasmoa une berean bizi behar dela (eta ia eskubideen mailan ipintzen duten pertsonak daude) pentsatzen duen bikotea atsekabetu egin daiteke hori lortzen ez duen bakoitzean, mito batean sinesten duelako. G puntuarekin berdin gertatzen dela pentsa daiteke eta ez dugu sutara egur gehiago bota nahi.

Garagardo festan topatu nuen lagun min batek horrelaxe esan zidan atzo: “g puntua bilatzen aritu... hori tontakeria galanta dela konturatu naiz jada, nik beste leku batean daukat ditxosozko g puntu hori (irribarrez eta orain arte sentitutako plazerrik handienari erreferentzia eginez). Nire mutilari non eta nola ukitzea gustatzen zaidan erakusteak horrek bai merezi duela!”

Anterior

Índice de artículos

Siguiente